Saturday, November 8, 2008

جاري .. ذلك المجهول


المدينة قاسية .. بمبانيها المرتفعة وشرفاتها الخالية أغلب الوقت، فالجميع في الداخل، هناك من يشاهد التليفزيون، هناك من يتحدث في الهاتف، وهناك من يجلس أمام شاشة الكمبيوتر الآن .. مثلي ومثلك!.


عندما كنت صغيرًا وعند شعوري بالملل الشديد، أخرج إلى الشرفة وأجري سباقًا خياليا بسيطًا بين كل ناصية من نواصي الشارع المقيم به، فالناصية الفائزة هي التي سيجتازها  أكثر عدد من الأشخاص في وقت معين، فمرور الرجل أو السيدة بمفرده له خمس نقاط ومرور رجلين أو سيدتين معًا له عشر نقاط، ومرور شخص على دراجة له عدد آخر من الدرجات، وهكذا إلى أن ينتهي الوقت المحدد وتعيين الفائز!، ولكن كان هناك تحيّز، فعندما كنت أقيم هذا السباق الخيالي وأمي أو أبي بالخارج، فأن مجيئهما من أي ناصية كان كفيل بإنهاء السباق وإعلان فوز هذه الناصية بالسباق حتى وإن لم يجتازها خلال الوقت المحدد أحد غير أبي أو أمي! ^_^


وكذلك أيضًا عندما كنت أركب وسيلة مواصلات ما لمكان بعيد تطول خلاله المسافة، مثل المصيف مثلا، أعتدت أن أتخيل شخصية كارتونية على لوح تزحلق خشبي وهي تجتاز في رشاقة السيارات التي حولي وتجتاز بدون تصادم أعمدة النور والنخيل والأشجار والأشخاص، كل ذلك لكي يمكنها أن تلحق بالعربة أو بالأتوبيس الذي أركبه، وعدم فقد أثري، كل ذلك وهي تقوم بحركات بهلوانية بلوح التزحلق أثناء محاولتها اللحاق بي!


 


قلت أن المدينة قاسية، صح؟، إذن دعوني أكررها مرة أخرى، المدينة قاسية!، وجيراننا نجهلهم، ولا أقصد بذلك جيراننا المقيمين في نفس بنايتنا فقط، ولكن أقصد الآخرين، هذا تقصير منّي، وهذه المشاهدات البسيطة هي محاولات لأن أتذكر عادات جيراني الذين لا أعرفهم!


وحاول!، فستلاحظ أن هناك عادات صغيرة لهم تتكرر من حولك، أشخاص تراهم هنا وهناك وهم يكررون عاداتهم اليومية الصغيرة .. في شارعك .. بالقرب منك .. أثناء ذهابك للصلاة .. لشراء احتياجاتك .. هذه دعوة لك لمحاولة تدوين عادات جيرانك .. ولتستكشف ذلك المجهول معي.


  وكعادتي في عالم التجزئة والسلاسل! ^_^، سأدون ما أراه أو أتذكره من تلك العادات تحت عنوان ثابت وبسيط  \\جيران وعادات\\


انتظرونا، مع أني لم أكتب شيء بعد، وآه وبهذه المناسبة .. أخيرًا عملت حكاية التصنيفات لكل موضوع، وأضفت قائمة التصنيفات على الجانب لتسهيل الوصول (قال يعني ممكن حد يتوه في مدونتي من كثرة مواضيعها ^_^ )


واممم مش بحب اكتب موضعين في يوم واحد ولكن هذا ليس موضوع، إنه إعلان كما ترون :D


ونقطة أخرى، صدقا لا أعرف ما الرابط العجيب بين مقدمة الموضوع وبين نهايته!، هكذا حدث الأمر!


 

6 comments:

نعكشة said...

الروقان :D

انا كنت وانا صغنونة بعمل سباقات بس بالعربيات اللي بتعدي

و كنت بحب اتفرج علي العربيات و هيا بتلمع بليل و كنت بستغرب مش عارفة لية بستغرب بس كنت بستغرب

حلوة حكاية الشخصية الكرتونية اللي بتتفقد اثرك دية

انا كنت بحس ان توم و جيري بيجروا ورايا بس كنت بخاف منهم صراحة

يلا خير

بالنسبة لعادات الناس
اذا كنت معرفش عادات نفسي ولا عادات الناس المقربين مني
هعرف عادات الجيران
ويا ريت في نفس البناية

عامةً المتابعة مش وحشة برضو
منتظرة عادات الجيران بتاعت حضرتك

ان شاء الله تكون حلوة

انا عندي حب الفضول :D

جميل ان الانسان يتفقد كل شيء بنظرة باحثة

سلام

أحمد فضيض said...

أمال إيه :D

ده خيال الأطفال :D
--
وأنا برضه كنت بعمل في البداية بالعربيات وبعدين استبعدتها من السباق عشان بتمر بسرعة مش بتحس بطعم البيوت !! :D
--
إزاي الأتنين بيجروا واركي لازم واحد منهم، ما توم بيطارد جيري وجيري مش فاضي يجري ورا حد :D

يلا خير :P
--
وده سبب كتابتي للموضوع عشان انتبه للحاجات الصغيرة حولي، هي فكرة عادات ساذجة وعادية كتير (هيبان كده لما أبدأ أكتب في الموضوع) بس يكفي شرف المحاولة

:D
--
وجميل مرورك

fofa said...

الله جميلة اوى الحاجات الي كنت بتعملها وانت صغير
فكرتها مختلفة كدة
انا مش فاكرة بصراحة حاجة معينة كنت بعملها
وبالنسبة لعادات الجيران
انا بلاحظ دايما ان جاري اللي ساكن في البيت اللي قدامي كل يوم تقريبا العصر
بيخرج يقف في البلكونةويشرب سيجارة وكوباية شاي
مش دي تمشي عادة برضوا ولا ايه
لو لاحظت حاجة تاني هاقول
ومنتظرة بقى العادات بتاعت جيرانك
فكرة جميلة اوى كالعادة

أحمد فضيض said...

د.فوفا

لوووول

هذه إحدى العادات اللي كنت هكتبها فيما بعد، الظاهر أخو الراجل ده عايش جنبنا

بمزح سترين أوجه التشابه لو كتبت عادته هنا :D

أسعدني مرورك :D

Anonymous said...

يا سلااااااااام
صحيح اللى يعيش ياما يشوف
وانا كنت صغيره كنت باعانى من دوار الحركه
ومكونتش باطيق نفسى فى المواصلات
بس حلوه الفكره اوى
---

بالنسبه للجيران :
فى جيران على طول الساعه 2 صباحا الاقيهم بيحمروا بطاطس .. والريحه توصلنا و تبقى حاجه تغيظ لانه وقت الواحد بيكسل يشرب كوباية ميه فما بالك بتقشير و تحمير


فى جيران فضلوا فتره طويله بيتخانقوا كل يوم جمعه
بس دلوقتى هدوا شويه
ولما ييجوا يتخانقوا بيبقى يوم جمعه برضو !


فى عاده بقا فى الجيران كلهم قربوا أو بعدوا
انه لازم فى أى امتحانات يكون فى فرح جنبنا
فرح حنه سبوع خطوبه
اى حاجه المهم يشغلوا الأغانى بصوت عالى عشان يدونا فرصه للهروب من المذاكره !


في جارة لينا صاحبة أختى
دول عادتهم انهم طول عمرهم ينادوا على بعض من المنور أو من البلكونه
و من عادة أطفال الشارع انهم ينادوا وراهم وكأنهم فى مظاهره

ممممممم
طولت اوى
عموما انا بحب جيرانى رغم اختلافى معهم فى الكثير ..
يعنى مش مؤذيين :D
موضوع حلو أوى
وأكيد هتابع الردود ان شاء الله عشان اشوف الناس بتعمل ايه

FIFA

Anonymous said...

مممممم عادات الجيران كانت حاجه بتسليني لفترة طويله بس توقفت عن ملاحظتها , عرفتني ؟؟؟ اه ان اللي في بالك صح لوول
تحياتي